నిధులేవీ.. అభివృద్ధి ఏదీ? చర్లగూడ గ్రామ సమస్యలపై ఎమ్మెల్యే కాలే యాదయ్యను నిలదీసిన సర్పంచ్ పెంటయ్య

షాబాద్ అక్టోబర్ 28 (తెలంగాణ ప్రజాగర్జన):

గ్రామంలో కనీస మౌలిక సదుపాయాలు లేక ప్రజలు తీవ్ర ఇబ్బందులు ఎదుర్కొంటున్నారని, అభివృద్ధి పనులకు అవసరమైన నిధులు మంజూరు కాకపోవడంతో గ్రామాభివృద్ధి కుంటుపడుతోందని చర్లగూడ గ్రామ సర్పంచ్ పెంటయ్య చేవెళ్ల ఎమ్మెల్యే కాలే యాదయ్యను ప్రశ్నించారు. గ్రామంలో అండర్‌గ్రౌండ్ డ్రైనేజీ వ్యవస్థ, సీసీ రోడ్లు, వీధి దీపాలు వంటి కనీస సదుపాయాలు కల్పించడంలో జాప్యం జరుగుతోందని ఆయన ఎమ్మెల్యే దృష్టికి తీసుకెళ్లారు.
గ్రామంలో నెలకొన్న సమస్యలను పరిష్కరించేందుకు నిధులు కేటాయించాలని కోరుతూ, చర్లగూడ గ్రామం చేవెళ్ల నియోజకవర్గ పరిధిలోకి రాదా? అంటూ సర్పంచ్ పెంటయ్య ప్రశ్నించినట్లు తెలిపారు. గ్రామ ప్రజలకు అవసరమైన మౌలిక వసతులు కల్పించాల్సిన బాధ్యత ప్రజాప్రతినిధులు, అధికారులపై ఉందని పేర్కొంటూ, అభివృద్ధి పనులకు నిధులు మంజూరు చేసి సమస్యలను పరిష్కరించాలని కోరారు.

ఏళ్లుగా అసంపూర్తిగా బ్రిడ్జి నిర్మాణం

గ్రామానికి సంబంధించిన బ్రిడ్జి నిర్మాణ పనులు ఏళ్లు గడుస్తున్నా పూర్తికాకపోవడంపై సర్పంచ్ పెంటయ్య ఆవేదన వ్యక్తం చేశారు. సకాలంలో పూర్తికావాల్సిన పనులు వివిధ కారణాలతో జాప్యానికి గురవుతున్నాయని, కాంట్రాక్టర్ నిర్లక్ష్యం వల్లే పనులు ఆలస్యమవుతున్నాయా అనే సందేహాలు వ్యక్తం చేశారు. బ్రిడ్జి నిర్మాణాన్ని త్వరితగతిన పూర్తి చేసి ప్రజలకు ఇబ్బందులు లేకుండా చూడాలని ఎమ్మెల్యేను కోరారు.

బ్రిడ్జి పనులపై డీఈ ని ఆరా తీసిన ఎమ్మెల్యే

చర్లగూడ గ్రామ సర్పంచ్ ప్రస్తావించిన బ్రిడ్జి నిర్మాణ సమస్యపై ఎమ్మెల్యే కాలే యాదయ్య స్పందించారు. సంబంధిత డీఈకి ఫోన్ చేసి పనుల ప్రస్తుత పరిస్థితి, జాప్యానికి గల కారణాలు, కాంట్రాక్టర్ పనితీరు తదితర అంశాలపై వివరాలు అడిగి తెలుసుకున్నారు. నిర్మాణ పనులు ఎందుకు ఆలస్యమవుతున్నాయి? ప్రస్తుతం పనులు ఏ దశలో ఉన్నాయి? అనే విషయాలపై సమగ్ర సమాచారం ఇవ్వాలని కోరారు.బ్రిడ్జి నిర్మాణ పనుల పురోగతిపై స్పష్టత తీసుకుంటూనే, గ్రామంలో నెలకొన్న మౌలిక సదుపాయాల సమస్యల పరిష్కారానికి అవసరమైన చర్యలు చేపట్టాలని సర్పంచ్ పెంటయ్య కోరారు. గ్రామాభివృద్ధికి నిధుల కేటాయింపు, అసంపూర్తి నిర్మాణ పనుల పూర్తి, ప్రజలకు కనీస వసతుల కల్పనపై అధికారులు దృష్టి సారించాల్సిన అవసరం ఉందని స్థానికులు అభిప్రాయపడుతున్నారు.